• 01228996519
  • 73و شارع عدلي يكن - المنيا

الدومين

ودة مفتاح الشقة بتاعتك بمعنى انه اللينك اللى بيوصل لموقعك علشان الناس تعرف توصلك وممكن تسمع كام مصطلح تانى ليه زى URL  او رابط او عنوان الموقع

يعنى ايه استضافة ؟

الاستضافة يعنى المساحة اللى موجودة لموقعك اون لاين علشان تسمحلة بإن الزوار بتوعك يوصله ليه بسهولة وفى اى وقت، والمساحة دى بتكون من اختيارك بس خلى بالك انك لازم تتأكد من مجموعة حاجات علشان تطمن ان الاستضافة دى مطابقة لمواصفات موقعك

تتأكد من اية ؟

1.      المساحة : وهى سعة الموقع لعدد الملفات اللى هتضيفها على الموقع، سواء كانت صور او فيديوهات او ملفات صوتية

2.      الترافيك او (Bandwidth) : وهى السعة اللى بيستحملها الموقع من عدد زيارات وغيرها

3.      مساحة قواعد البيانات : وهى المساحة اللى بتستوعبها قاعدة بياناتك من داتا بتسجلها فى الموقع

دى الحاجات الاساسية اللى المفروض تتأكد منها

فيه حاجات تانية ؟

اكيد طبعاً ، زى عدد الايميلات اللى هتسجلها على الموقع وبيانات لوحة التحكم الخاصة بك وغيرها من تفاصيل تانية. زي مثلاً لو عندك كذا موقع ممكن متدفعش فلوس استضافة جديدة لكن ببساطة تقدر تستعمل خاصية اسمها Addon Domains  ودى هتساعدك تستضيف عدد من المواقع الفرعية الخاصة بنشاطك بزيادة بسيطة فى اشتراكك الاساسى من غير ما تحتاج تشترى استضافة جديدة

طيب هو فيه استضافة او دومين مجانى ؟

اكيد طبعاً فيه شركات كتير بتوفر خدمة الاستضافة المجانية من غير اى تكاليف ولكن بتكون بإمكانيات محدودة، زى مثلاً المساحة او عدد قواعد البيانات وغيرها كتير

هل تنصح بالاستضافة المجانية ؟

لا، مش علشان مجانية تبقى مش كويسة لكن ملفاتك مش بتبقى فى امان، يعنى فى يوم وليلة ممكن ماتلاقيش الموقع بتاعك موجود اون لاين او داتا منه اتمسحت او يمكن كمان تلاقى الموقع مخترق بسبب عدم اهتمام الشركة بالعملاء المجانيين

ايه هى انواع الاستضافة؟

1.      الاستضافة المشتركة Shared Hosting: ودى بتخليك مشترك فى نفس الاى بى IP مع شركات او مستخدمين تانيين ودة بيخلى نسبة امان موقعك تقل

2.      الاستضافة المستقلة Dedicated Hosting: ودى بتخلى ليك اى بى IP لوحدك ودة بيقلل فرصة ان موقعك يتم اختراقة، بل بالعكس دة ممكن مع شوية اعدادات بسيطة تبقى فى اعلى درجات الامان

3.      الموزع Reseller: ودة بيكون شخص او شركة هتبيع حسابات لشركات تحتها زى شركتنا كدة، ودة بيخلى ليك صلاحيات وامكانيات كبيرة جدا تقدر تتحكم فيها من خلال لوحة تحكم الموزع

4.      الخادم الافتراضى VPS (Virtual Private Server) : ودة بيديك امكانيات اكبر واكبر من الموزع وبيخليك كمان تقدر تدى حسابات Shared او Reseller

 

لو بتفكر تعمل موقع وعايز تفاصيل اكتر كلم الدعم والمبيعات من هنا، او اطلب عرض سعر لموقعك من هنا